سدرہ سے آگے جبرئیل/ فروغ تجلی بسوزد پرم

••• *فروغِ تجلی بسوزد پرم*•••

 واقعہ معراج میں خطباء و واعظین کی زبانی بارہا سننے کو ملتا ھے کہ جب نبی کریم کو معراج کرائی گئ اور آپ آسمانوں کی سیر کرتے ہوئے " سدرۃ المنتھٰی" پہونچے تو حضرت جبرئیل علیہ السلام جو اب تک آپ کے ساتھ ساتھ تھے فرمانے لگے: کہ بس میری حد اس مقام سے آگے گزرنے کی نہیں ھے ؛ اگر میں بال برابر بہی آگے بڑھا تو تجلیات ربانی سے میرے بال و پر جل کر راکھ ہوجاینگے!!

کیا حضرت جبرئیل کا یہ مکالمہ حدیث میں مذکور ھےیا محض مشہور ھے ؟...!!

<< *باسمہ تعالی*>>
*الجواب وبه التوفيق*

واقعۂ معراج کی مناسبت سے مستند روایات سے جتنا ثابت ہوا ان میں حضرت جبرئیل علیہ السلام کا یہ مکالمہ ہمیں نہ مل سکا, اس مکالمہ کو "سعدی شیرازی " نے بہی بوستان میں ایک نعت مبارکہ کا شعر بنایا ھے:

؎ اگر یک سر مو فراتر پرم
     فروغ تجلی بسوزد پرم.


 اور موجودہ زمانہ میں بہی ایک نعت اسی نام سے بہت مشہور و معروف ھے:

(سدرہ سے بہی آگے کون گیا, جبریل امیں سے پوچھو)



🔴 در اصل حضرت ابن عباس رضی اللہ عنہما پر ایک مفصل طویل روایت تقریبا پندرہ بیس صفحات کی واقعہ معراج کے متعلق گھڑی گئی ہے ، جو مستقل ایک رسالہ میں چھپتی رہتی ہے ، اور جاہل  ہر سال اس کو 27 رجب کو پڑھنے کا اہتمام کرتے ہیں ، اس روایت کی سب سے پہلے تو کوئی سند مذکور نہیں ہوتی ہے ، اور دوسری بات کہ اس میں بعض جزئیات صحیح ہیں ، مگر ان کے ساتھ بےشمار من گھڑت باتیں خلط ملط کردی گئی ہیں جس کی وجہ سے صحیح غلط کی تمیز دشوار ہوتی ہے ۔

مذکورہ رسالہ کی ابن عباس رضی اللہ عنہما کی طرف نسبت کی بابت بہت سے علماء نے تصریح کی ہے کہ یہ سراسر جھوٹ ہے ۔


*من گھڑت رسالے کا نام*

کتاب :الاسراء والمعراج
المؤلف: ابن عباس
الطبع: شركة الشمرلي، قاهره، مصر.




🎴 *تنزيه الشريعة ميں*

 وہ من گھڑت طویل روایت جو معراج کے متعلق ھے تنزیه الشريعة میں دیکہی جاسکتی ھے۔

المصدر: تنزيه الشريعة
المؤلف:ابو الحسن الكناني
المجلد:1
الصفحة:169/155
الطبع:دار الكتب العلمية، بيروت، لبنان
الدرجة: فيه ميسرة بن عبد ربه، وهو متهم.


(فائدہ) اسی راوی میسرہ نے بظاہر یا اس کے شیخ عمر بن سلیمان الدمشقی نے اس روایت کو گھڑا ھے ؛ ابن حبان نے "میسرہ" کے حالات میں واقعہ معراج کی طویل من گھڑت روایت کے کچھ اجزاء  ذکر کرکے نشاندہی کی ھے۔

المصدر:كتاب المجروحين
المؤلف:  ابن حبان
المجلد:2
الصفحة:344
الطبع: دار الصميعي، الرياض،

⚡ حافظ ذہبی نے بہی ابن حبان کی تایئد کی ھے:

المصدر: میزان الاعتدال
المؤلف: الحافظ ذهبي
المجلد:4
الصفحة:231
الطبع: دار المعرفة، بيروت لبنان.

  ✴ *قرطبی کی عبارت*

قلت : وقد روي عن ابن عباس في قوله تعالى : دنا فتدلى أنه على التقديم والتأخير ; أي تدلى الرفرف لمحمد صلى الله عليه وسلم ليلة المعراج فجلس عليه ثم رفع فدنا من ربه قال : فارقني جبرئيل، وانقطعت عني الاصوات، وسمعت كلام ربي.

خلاصہ ترجمة:
جب حضور رب سے قریب ہوگئے تو جبرئیل حضور سے الگ ہوگئے اور اس وقت ہر آواز سنائی دینی بند ہوگئ اور میں نے رب کا کلام سنا۔

المصدر: تفسیر القرطبی
المؤلف: محمد القرطبی
المجلد:20
الصفحہ:31
الطبع: مؤسسہ الرسالہ, بیروت

علامہ قرطبی نے اس اثر ابن عباس کی سند و حوالہ بیان نہ کیا جس میں انہوں نے حضرت جبرئیل اور نبی کریم کے الگ ہونے کا ذکر فرمایا ھے.


🔰 *فتح الباری میں*

حافظ ابن حجر نے فتح الباری میں لکہا ھے : سدرہ المنتہی سے آگے حضور علیہ السلام کے علاوہ کوئی نہیں جاسکا؛ لیکن حافظ نے اس بات کے حوالہ کے طور پر امام نووی کی شرح منہاج کی عبارت نقل کی ھے:

وقال النووي : سميت سدرة المنتهى ؛ لأن علم الملائكة ينتهي إليها ، ولم يجاوزها أحد إلا رسول الله - صلى الله عليه وسلم -.

المصدر :فتح الباری
المؤلف: ابن حجر العسقلانی
المجلد: 7
الصفحہ: 213
الطبع: المکتبہ السلفیہ,

📓 *امام نووی کی صراحت*

امام نووی رح نے شرح مسلم میں حضرت ابن عباس کے اثر کا حوالے سے وہی بات کہی ھے جو قرطبی میں موجود ھے لیکن نووی نے اس اثر کی سند ذکر نہیں فرمائی.

▫ قال ابن عباس والمفسرون وغيرهم : سميت سدرة المنتهى لأن علم الملائكة ينتهي إليها ولم يجاوزها أحد إلا رسول الله - صلى الله عليه وسلم - .

 مفہوم ترجمہ: سدرہ سے آگے فقط حضور ہی گئے ہیں

المصدر: المنھاج
المؤلف:نووی
المجلد:2
الصفحہ:214
الطبع: طبع منیریہ مصر,

⚠ *قاضی عیاض کی شفا*

قاضی عیاض مالکی کی "الشفاء" میں ابن عباس کے حوالہ سے یہی بات مذکور ھے کہ حضرت جبرئیل پھر مجھ سے جدا ہوگئے اور میں نے رب کی گفتگو سنی.

 جبکہ شارح شفاء ملا علی قاری نے اسی مقام کی شرح میں لکہا ھے: کہ حضرت جبرئیل کی مفارقت اس وجہ سے تہی کہ اگر وہ ایک پوروے کی بقدر بہی آگے بڑھتے تو جل جاتے۔

المصدر:  شرح الشفاء
المؤلف:  ملا علي القارئ
المجلد:1
الصفحة:440
الطبع: دار الكتب العلمية، بيروت، لبنان.

⚖قاضی عیاض وغیرہ سے اس بارے میں تساہل ہوا ہے ، اور ان کا مستند یہی من گھڑت روایت ہے جو تفسیر ”ميسرة ابن مردویہ “اور ˝تفسیر نقاش˝ میں اسی سند سے منقول ہے ( میسرہ عن عمر بن سلیمان عن الضحاک عن ابن عباس )۔

🔘 *عمدة القارئ كي عبارت*

علامہ بدر الدین عینی شارح بخاری رح نے بہی نووی جیسی بات کہی ھے کہ سدرہ سے آگے ہمارے نبی کریم کے علاوہ کوئی نہیں گیا ھے ۔

المصدر: عمدة القارئ

المؤلف:بدر الدين العيني 

المجلد:7

الصفحة:28

الطبع:  دار الفكر، بيروت۔

⏳ *تفسیر ابن عاشور میں*

مشہور مفسر  " محمد بن طاہر" المعروف بابن عاشور  نے [وَمَا مِنَّا إِلَّا لَهُ مَقَامٌ مَعْلُوم.]

ٌ[الصافات:164].

 کی تفسیر کرتے ہوئے اس مکالمہ کا ذکر فرمایا ھے :

🔅وعن مقاتل أن قوله " وما منا إلا له مقام معلوم " إلى " المسبحون " نزل ورسول الله صلى الله عليه وسلم عند سدرة المنتهى فتأخر جبريل فقال له النبيء : أهنا تفارقني فقال : لا أستطيع أن أتقدم عن مكاني ، وأنزل الله حكاية عن قول الملائكة " وما منا إلا له مقام معلوم " الآيتين .

*ماحصل ترجمہ*

 مقام سدرةالمنتہی پر حضرت جبرئیل پیچھے ہٹ گئے تو نبی کریم نے عرض کیا: یہاں مجھے چھوڑ رھے ہو؟ جبریل بولے: میں اس سے آگے نہیں جاسکتا ۔

المصدر: التحریر والتنویر المعروف  بتفسیر ابن عاشور

المؤلف: ابن عاشور

المجلد: 23

الصفحہ: 191

الطبع: الدار التيونسية للنشر،

▪ *مقاتل بن سلیمان*

  تفسیر ابن عاشور میں جس راوی " مقاتل بن سلیمان" کے واسطہ سے یہ بات مذکور ھے وہ راوی تفسیر و حدیث کے باب میں قابل اطمینان نہیں , ان کو کذاب اور جہوٹا بہی کہا گیا ھے؛ لہذا تفسیر میں منقول ان کا یہ کلام غیر معتبر ٹہرا کہ حضور اور جبریل کے درمیان سدرہ کے پاس کوئی اس طرح کا مکالمہ ہوا ھے۔

 المصدر : تہذیب الکمال 

المؤلف: يوسف المزي

المجلد:28

الصفحة:451/445

الطبع:  مؤسسة الرسالة، بيروت، لبنان.

♦ *اکمال المعلم شرح مسلم*

 قاضی عیاض کی شرح مسلم "اکمال المعلم" کے محقق - دکتور حسین بن محمد الشواط- کی صراحت پڑھنے سے معلوم ہوا کہ حضرت جبرئیل کے جدا ہونے والی بات جو امام نووی و ابن حجر و عینی اور قاضی عیاض نے ذکر کی ھے وہ *محمد بن حسن النقاش* کی جانب منسوب ھے جو کہ مناکیر روایت کرنے میں مشہور ہیں۔

المصدر: اکمال المعلم شرح مسلم

المؤلف: قاضی عیاض المالکی

المحقق: الدکتور الحسین بن محمد شواط

المجلد:1

الصفحہ: 698

الطبع: دار الوطن الریاض

💡 نیز  "محمد بن حسن النقاش " امام ذہبی کی صراحت کے مطابق اپنی روایات و تفسیر کے تناظر میں قابل اطمینان نہیں ہیں ۔

المصدر: سیر اعلام النبلاء

المؤلف: ذھبی

الراوی المتکلم فیہ: 5101

الصفحہ:3393

الطبع: بیت الافکار الدولی سودان,

____ *الغرض* ____

واقعۂ معراج کی جو روایات صحیحہ و مستندہ ہیں ان میں جبرئیل علیہ السلام کی مفارقت کا ذکر نہیں ھے؛ تاہم جن علماء و مفسرین امت نے اس بات کا ذکر کیا ھے انہوں نے اپنا مستدل ابن عباس رض کے اثر کو بنایا ھے جسکی سند وغیرہ کا انہوں نے ذکر ہی نہ کیا؛ لہذا اس مکالمہ کو حتمی و قطعی تب تک نہیں مانا جاسکتا جب تک مستند ذریعہ سے اسکا ثبوت نہ مل سکے ۔

وﷲ تعالی اعلم

✍🏻...کتبہ: *محمد عدنان وقار صدیقی*

22/05/2019

حضرت جابر کے بچوں کو زندہ کرنا

▪ *حضرت جابر کے بچے*▪

مشہور ھے کہ غزوہ خندق کے موقع پر حضرت جابر نے حضور کی دعوت کی اور حضور  صحابہ کرام کو لیکر حضرت جابر کے مکان پر پہونچے حالانکہ کہانا بہت کم تہا ؛کیونکہ دعوت فقط حضور کی تہی؛تب حضور کے معجزہ کی برکت سے وہ قلیل کہانا تمام صحابہ کو کافی ہوا اور پھر بہی جوں کا توں باقی رہا, لیکن اسی دوران یہ واقعہ پیش آیا کہ حضرت جابر کے دو لڑکے تھے اور ان میں سے بڑے نے چھوٹے کو کہا: کہ میں تجھے دکھاتا ہوں کہ بکری ذبح کیسے کیسے جاتی ھے اور اس نے چھوٹے کو ذبح کردیا یہ منظر دیکھ حضرت جابر کی اہلیہ اسکی طرف دوڑیں تو بڑا بیٹا گھبراہٹ کے مارے جیسے بھاگا تو چھت سے گر کر فوت ہوگیا۔ الغرض! حضرت جابر کی اہلیہ نے یہ بات کسی کو ظاہر نہ کی , اور دعوت وکہانے  کا انتظام کرتی رہیں اور دونوں مرحوم بچوں کو چادر اڑھا کر کمرہ میں چھپا رکھا۔  کہانا شروع ہونے سے پہلے حضرت جبریل نازل ہوئے  اور نبی کریم سے کہا: اللہ کہتا ھے کہ آپ حضرت جابر کے لڑکوں کو بہی کہانے کے لیے ساتھ بلایئں ؛ لیکن وہ تو فوت ہوچکے تھے تب حضور کو علم ہوا تو آپ نے انکو بحکم خداوندی زندہ کردیا۔

اس واقعہ کے دوسرے حصہ یعنی لڑکوں کو دوبارہ زندہ کرنے  میں کتنی صداقت ھے؟

<< *باسمہ تعالی*>>
*الجواب باسم ملھم الصواب*

 یہ واقعہ دو باتوں پر مشتمل ھے:
1) حضرت جابر کا معمولی اور قلیل کھانا صحابہ کی ایک بڑی جماعت کو کافی ہوگیا

2) حضرت جابر کے دونوں لڑکوں کا دوبارہ زندہ کرنا۔

1⃣ پہلی بات یعنی حضرت جابر کے گھر بنا ہوا قلیل کہانا صحابہ کے لشکر کو کافی ہوگیا یہ واقعہ صحیح اور بالکل درست ھے یہ حضور اکرم کا معجزہ تہا جسکا ذکر بخاری سمیت دیگر کتب حدیث و تفسیر اور کتب سیرت میں موجود ھے۔

🔘 *بخاری کی حدیث*

وعن جابر: قَالَ: إِنَّا كُنَّا يَوْم  الخَنْدَقِ نَحْفِرُ، فَعَرضَتْ كُدْيَةٌ شَديدَةٌ، فجاءُوا إِلى النبيِّ ﷺ فقالوا: هَذِهِ كُدْيَةٌ عَرَضتْ في الخَنْدَقِ، فَقَالَ: أَنَا نَازِلٌ، ثُمَّ قَامَ وبَطْنُهُ مَعْصوبٌ بِحَجَرٍ، وَلَبِثْنَا ثَلاثَةَ أَيَّامٍ لا نَذُوقُ ذَوَاقًا، فَأَخَذَ النَّبِيُّ ﷺ المِعْوَل، فَضرَب؛ فَعَادَ كَثيبًا أَهْيَلَ -أَوْ: أَهْيَمَ- فقلتُ: يَا رسولَ اللَّه، ائْذَن لي إِلى البيتِ، فقلتُ لامْرَأَتي: رَأَيْتُ بِالنَّبِيِّ ﷺ شَيْئًا ما في ذلكَ صَبْرٌ، فعِنْدَكِ شَيءٌ؟ فقالت: عِندِي شَعِيرٌ وَعَنَاقٌ، فَذَبَحْتُ العَنَاقَ، وطَحَنَتِ الشَّعِيرَ، حَتَّى جَعَلْنَا اللَّحْمَ في البُرْمَة، ثُمَّ جِئْتُ النبيَّ ﷺ وَالعَجِينُ قَدِ انْكَسَرَ، والبُرْمَةُ بيْنَ الأَثَافِي قَد كَادَت تَنْضَجُ، فقلتُ: طُعَيِّمٌ لي، فَقُمْ أَنْت يَا رسولَ اللَّه وَرَجُلٌ أَوْ رَجُلانِ، قَالَ: كَمْ هُوَ؟ فَذَكَرتُ لَهُ، فَقَالَ: كثِيرٌ طَيِّبٌ، قُل لَهَا: لا تَنْزِع البُرْمَةَ ولا الخُبْزَ مِنَ التَّنُّورِ حَتَّى آتِيَ، فَقَالَ: قُومُوا، فقام المُهَاجِرُون وَالأَنْصَارُ.
فَدَخَلْتُ عليها فقلتُ: وَيْحَكِ! جَاءَ النبيُّ ﷺ وَالمُهَاجِرُونَ وَالأَنْصارُ وَمن مَعَهم! قالت: هَلْ سأَلَكَ؟ قلتُ: نَعَمْ، قَالَ: ادْخُلوا وَلا تَضَاغَطُوا، فَجَعَلَ يَكْسِرُ الخُبْزَ، وَيَجْعَلُ عليهِ اللَّحْمَ، ويُخَمِّرُ البُرْمَةَ والتَّنُّورَ إِذا أَخَذَ مِنْهُ، وَيُقَرِّبُ إِلى أَصْحَابِهِ، ثُمَّ يَنْزِعُ، فَلَمْ يَزَلْ يَكْسِرُ وَيَغْرِفُ حَتَّى شَبِعُوا، وَبَقِيَ مِنه، فَقَالَ: كُلِي هذَا وَأَهْدِي، فَإِنَّ النَّاسَ أَصَابَتْهُمْ مَجَاعَةٌ.

--- *خلاصۂ ترجمہ* ---

حضرت جابر فرماتے ہیں کہ میں نے رسول اللہ ﷺ کی خدمت میں عرض کیا کہ یا رسول اللہ ﷺ مجھے گھر جانے کی اجازت دیدیجیۓ، چنانچہ گھر آکر میں نے اپنی بیوی سے کہا کہ میں نے نبی کریم ﷺ کو ایسی حالت میں دیکھا ہے کہ صبر نہ ہو سکا، تمھارے پاس کھانے کو کچھ ہے؟ بیوی نے کہا میرے پاس کچھ جَو ہیں اور بکری کا ایک بچہ ہے، چنانچہ میں نے بکری کا وہ بچہ ذبح کیا اور بیوی نے جَو پیسے یہاں تک کہ گوشت کو ہم نے (پکنے کیلۓ) ہانڈی میں رکھ دیا۔
پھر میں حضور ﷺ کی خدمت میں حاضر ہوا اور آٹا ٹوٹ چکا تھا (خمیر اٹھنے لگا تھا) ہانڈی چولہے پر تھی اور پکنے کے قریب تھی۔
حضرت جابرٗ نے آپکی خدمت میں حاضر ہو کر عرض کیا:"مختصر سا کھانا ہے، آپ تشریف لے چلیں یا ایک دو آدمی آُپکے ساتھ ہوں"
آپ ﷺ نے پوچھا کتنا کھانا ہے؟
میں نے بتا دیا (اتنا ہے)
 آپ ﷺ نے فرمایا: اچھا خاصا ہے اور ساتھ ہی یہ بھی فرمایا کہ جب تک میں نہ آجاؤں، بیوی سے کہہ دو کہ نہ ھانڈی چولہے سے اتارے نہ روٹیاں تنور میں لگاۓ۔
 پھر آپ ﷺ نے صحابہ میں اعلان فرمایا کہ جابر کی دعوت ہے، سب چلو۔
 اُدھر حضرت جابرٗ گھر بیوی کے پاس پہنچے اور(کم کھانا اور زیادہ مہمان آنے کی وجہ سے شرم کے مارے) کہا کہ: تیرا بھلا ہو! حضور تو مہاجرین اور انصار سب کو ساتھ لا رہے ہیں۔
 بیوی نے حضرت جابر سے پوچھا: حضور ﷺ نے تم سے کھانے کے متعلق پوچھ لیا تھا؟
انہوں نے کہا کہ ہاں پوچھ تو لیا تھا۔
 اِس سے انکو اطمینان ہوگیا کہ پھر آپ اپنے اور اللہ کے اعتماد پر لے کر آرہے ہیں۔
آپ نے صحابہ سے فرمایا"اندر چلو اور رش نہ کرو"۔
 چنانچہ آپ ﷺ روٹیاں توڑنے لگے اور اُن پر بوٹیاں رکھنے لگے، اور ہانڈی سے گوشت اور تنور سے روٹی لے کر ان کو ڈھانک دیتے تھے، اِسی طرح برابر آپ ﷺ روٹی کے ٹکڑے کرکر کے دیتے رہے اور ہانڈی میں سے چمچ بھر بھر کر لیتے رہے یہاں تک کہ سب آسودہ (شکم سیر) ہوگئے اور کھانا کچھ بچ بھی گیا، پھر آپ ﷺ نے حضرت جابر کی بیوی سے فرمایا:
"یہ تم خود بھی کھاؤ اور محلے پڑوس میں بھی ہدیہ بھیجو! اسلئے کہ لوگوں کو بھوک لاحق ہے"

بخاری: 2
صفحہ:1114
حدیث نمبر:4101
طبع: الطاف اینڈ سنز کراچی.

♦اس واقعہ کو عام سہل اردو زبان میں " معارف القرآن" میں بہی پڑھا جاسکتا ھے,

معارف القرآن :7
صفحہ:107
سورت: احزاب
طبع:مکتبہ معارف القرآن کراچی۔

2⃣ *واقعہ کا دوسراء جزء*

 دوسری بات کہ حضرت جابر کے مرحوم لڑکوں کو حضور نے زندہ کیا اس بات کا مستند کتب میں ذکر نہیں یعنی اس بات کو تسلیم نہیں کیا جاسکتا ۔

⚠ *زندہ کرنے کا ذکر*
یہ زندہ کرنیوالی بات "شواہد النبوہ" میں ملا جامی رح نے ذکر کی ھے؛ لیکن سند یا حوالہ ذکر نہیں کیا ھے۔

📓 شواہد النبوہ
نام مؤلف: عبد الرحمن جامی
صفحہ: 104
طبع: مکتبہ حقیقیہ, استنبول, ترکی

🔰 *دوسری کتاب میں ذکر*

اس واقعہ کا ذکر شواہد النبوہ کے حوالہ سے ایک اور کتاب "احوال الخمیس" میں بہی شیخ حسین دیار بکری نے بہی کیا ھے؛ لیکن خود ہی لکھا ھے کہ یہ بات مشہور نہیں ھے یعنی پایۂ ثبوت کو نہیں پہونچتی ھے۔

*تاریخ الخمیس کی عبارت*

(قصة احياء أولاد جابر)

وفى هذه السنة أو فى غيرها وقعت قصة أولاد جابر بن عبد الله الانصارى* فى شواهد النبوّة عن جابر بن عبد الله انه دعا رسول الله صلى الله عليه وسلم ذات يوم الى القرى فأجابه النبىّ صلّى الله عليه وسلم ففرح جابر فدخل رسول الله صلّى الله عليه وسلم فجلس وكان لجابر داجن فذبحه ليشويه وكان له ابنان فقال كبيرهما للصغير هلم أورك كيف ذبح أبى الحمل فأضجع الصغير وربط يديه ورجليه فذبحه وحز رأسه وجاء به الى أمه فلما رأته أمه دهشت وبكت فخاف الصبى وهرب على السطح فتبعته أمه فزاد خوفه فرمى نفسه من السطح فهلك فسكتت المرأة وأدخلت ابنيها البيت وغطتهما بمسح فى ناحية من البيت واشتغلت بطبخ الحمل وكانت تخفى الحزن وتظهر السرور ولم يعلم جابر ما وقع فلما تمّ الطبخ وقرب الى رسول الله صلّى الله عليه وسلم أتى جبريل وقال يا محمد ان الله يأمرك أن تأكل مع أولاد جابر فقال رسول الله صلّى الله عليه وسلم ذلك لجابر فطلب جابر ابنيه فقالت امرأته انهما ليسا بحاضرين فأخبر جابر بذلك رسول الله صلّى الله عليه وسلم فقال ان الله يأمرك باحضارهما فرجع جابر الى امرأته وأخبرها بذلك فعند ذلك بكت المرأة وكشفت الغطاء عنهما فلما رآهما جابر تحير وبكى وأخبر بذلك رسول الله صلّى الله عليه وسلم فنزل جبريل وقال يا محمد ان الله يأمرك أن تدعو لهما ويقول منك الدعاء ومنا الاجابة والاحياء فدعا رسول الله صلّى الله عليه وسلم فحييا باذن الله تعالى كذا فى شواهد النبوّة *لكنها لم تشتهر اشتهارا*...

المصدر: تاریخ الخمیس فی احوال انفس نفیس
المؤلف: حسین بن محمد دیار بکری
الصفحہ:500
الطبع: مؤسسہ شعبان, بیروت,لبنان۔

🛑 *بکری کو زندہ کرنا*

اسی واقعہ کے تتمہ میں بعض کتب میں یہ واقعہ بہی بیان کیا جاتا ھے کہ حضرت جابر نے حو بکری کا بچہ دعوت کے کھانے کے لیے ذبح کیا تہا اور صحابہ کرام اسکو تناول فرمارھے تھے حضور کا حکم تہا کہ اس بکرے کی ہڈی نہ توڑی جایئں,  پھر ساری ہڈیوں کو جمع کرکے آپ نے ان پر کچھ پڑھا تو وہ بکری زندہ ہوکر اٹھ کھڑی ہوئی,  نبی پاک علیہ السلام نے اسکو معجزاتی طور پر بحکم رب دوبارہ زندہ کردیا تہا اور وہ بکری حضرت جابر کو عطا کرتے ہوئے حضور اقدس نے دعاء فرمائی : کہ اللہ اس میں برکت دے۔

✳ حَدَّثَنَا عَبْدُ اللَّهِ بْنُ مُحَمَّدِ بْنِ جَعْفَرٍ  ، إِمْلاءً وَقِرَاءَةً ، قَالَ : ثنا عَبْدُ الرَّحْمَنِ بْنُ حَمَّادٍ ، قَالَ : ثنا  أَبُو بَرَّةَ مُحَمَّدُ بْنُ أَبِي هَاشِمٍ مَوْلَى بَنِي هَاشِمٍ بِمَكَّةَ ، قَالَ : ثنا  أَبُو كَعْبٍ الْبَدَّاحُ بْنُ سَهْلٍ الأَنْصَارِيُّ ، عَنْ أَبِيهِ  سَهْلِ بْنِ عَبْدِ الرَّحْمَنِ ، عَنْ أَبِيهِ عَبْدِ الرَّحْمَنِ بْنِ كَعْبِ بْنِ مَالِكٍ ، قَالَ :  " أَتَى جَابِرُ بْنُ عَبْدِ اللَّهِ  رَسُولَ اللَّهِ صَلَّى اللَّهُ عَلَيْهِ وَسَلَّمَ ،  فَسَلَّمَ عَلَيْهِ ، فَرَدَّ عَلَيْهِ السَّلامَ ، قَالَ : فَرَأَيْتُ وَجْهَ رَسُولِ اللَّهِ صَلَّى اللَّهُ عَلَيْهِ وَسَلَّمَ مُتَغَيِّرًا ، وَمَا أَحْسِبُ وَجْهَ رَسُولِ اللَّهِ صَلَّى اللَّهُ عَلَيْهِ وَسَلَّمَ تَغَيَّرَ إِلا مِنْ جُوعٍ , فَأَتَيْتُ مَنْزِلِي ، فَقُلْتُ لِلْمَرْأَةِ : وَيْحَكِ ، لَقَدْ رَأَيْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ ، فَسَلَّمْتُ عَلَيْهِ ، فَرَدَّ عَلِيَّ السَّلامَ وَوَجْهُهُ مُتَغَيِّرٌ ، وَمَا أَحْسِبُ وَجْهَهُ تَغَيَّرَ إِلا مِنَ الْجُوعِ ، فَهَلْ عِنْدَكِ مِنْ شَيْءٍ ؟ قَالَتْ : وَاللَّهِ مَا لَنَا إِلا هَذَا الدَّاجِنُ وَفَضْلَةٌ مِنْ زَادٍ نُعَلِّلُ بِهَا الصِّبْيَانَ ، فَقُلْتُ لَهَا : هَلْ لَكِ أَنْ نَذْبَحَ الدَّاجِنَ وَتَصْنَعِينَ مَا كَانَ عِنْدَكِ ، ثُمَّ نَحْمِلُهُ إِلَى رَسُولِ اللَّهِ صَلَّى اللَّهُ عَلَيْهِ وَسَلَّمَ ؟ قَالَتْ : أَفْعَلُ مِنْ ذَلِكَ مَا أَحْبَبْتَ ، قَالَ : فَذَبَحَتِ الدَّاجِنَ ، وَصَنَعَتْ مَا كَانَ عِنْدَهَا , وَطَحَنَتْ وَخَبَزَتْ , وَطَبَخَتْ ، ثُمَّ ثَرَدْنَا فِي جَفْنَةٍ لَنَا ، فَوَضَعَتِ الدَّاجِنَ ، ثُمَّ حَمَلْتُهَا إِلَى رَسُولِ اللَّهِ صَلَّى اللَّهُ عَلَيْهِ وَسَلَّمَ ، فَوَضَعْتُهَا بَيْنَ يَدَيْهِ ، فَقَالَ :  مَا  هَذَا يَا جَابِرُ ؟ قُلْتُ : يَا رَسُولَ اللَّهِ ، أَتَيْتُكَ فَسَلَّمْتُ عَلَيْكَ ، فَرَأَيْتُ وَجْهَكَ مُتَغَيِّرًا ، فَظَنَنْتُ أَنَّ وَجْهَكَ لَمْ يَتَغَيَّرْ إِلا مِنَ الْجُوعِ ، فَذَبَحْتُ دَاجِنًا كَانَتْ لَنَا ثُمَّ حَمَلْتُهَا إِلَيْكَ ، قَالَ : يَا جَابِرُ ، اذْهَبْ فَاجْمَعْ لِي قَوْمَكَ ، قَالَ : فَأَتَيْتُ أَحْيَاءَ الْعَرَبِ ، فَلَمْ أَزَلْ أَجْمَعُهُمْ فَأَتَيْتُهُ بِهِمْ ، ثُمَّ دَخَلْتُ ، فَقُلْتُ : يَا رَسُولَ اللَّهِ ، هَذِهِ الأَنْصَارُ قَدْ أُجْمِعَتْ ، فَقَالَ : أَدْخِلْهُمْ عَلَيَّ أَرْسَالا ، فَأَدْخَلْتُهُمْ عَلَيْهِ أَرْسَالا ، فَكَانُوا يَأْكُلُونَ مِنْهَا ، فَإِذَا شَبِعَ قَوْمٌ خَرَجُوا وَدَخَلَ آخَرُونَ ، حَتَّى أَكَلُوا جَمِيعًا ، وَفَضَلَ فِي الْجَفْنَةِ شَبِيهُ مَا كَانَ فِيهَا ، وَكَانَ رَسُولُ اللَّهِ صَلَّى اللَّهُ عَلَيْهِ وَسَلَّمَ ، يَقُولُ : كُلُوا وَلا تَكْسِرُوا عَظْمًا ، ثُمَّ إِنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ جَمَعَ الْعِظَامَ فِي وَسَطِ الْجَفْنَةِ ، فَوَضَعَ يَدَهُ عَلَيْهَا ثُمَّ تَكَلَّمَ بِكَلامٍ لَمْ أَسْمَعْهُ إِلا أَنِّي أَرَى شَفَتَيْهِ تَتَحَرَّكَانِ ، فَإِذَا الشَّاةُ قَدْ قَامَتْ تَنْفُضُ أُذُنَيْهَا ، فَقَالَ لِي : خُذْ شَاتَكَ يَا جَابِرُ ، بَارَكَ اللَّهُ فِيهَا ، فَأَخَذْتُهَا وَمَضَيْتُ , وَإِنَّهَا لَتُنَازِعُنِي أُذُنَهَا ، حَتَّى أَتَيْتُ بِهَا الْبَيْتَ ، فَقَالَتْ لِيَ الْمَرْأَةُ : مَا هَذِهِ يَا جَابِرُ ؟ قُلْتُ : وَاللَّهِ شَاتُنَا الَّتِي ذَبَحْنَاهَا لِرَسُولِ اللَّهِ صَلَّى اللَّهُ عَلَيْهِ وَسَلَّمَ ، دَعَا اللَّهَ فَأَحْيَاهَا ، قَالَتْ : أَنَا أَشْهَدُ أَنَّهُ رَسُولُ اللَّهِ ، أَنَا أَشْهَدُ أَنَّهُ رَسُولُ اللَّهِ ، أَنَا أَشْهَدُ أَنَّهُ رَسُولُ اللَّهِ "  .



 ▫المصدر: دلائل النبوة
      المؤلف:ابونعیم
      الصفحہ:615
      الرقم: 560
      الفصل: 30
      الطبع:دار النفائس, بیروت لبنان

🔅  *اس بات کی تحقیق*

 یہ بکری کو زندہ کرنیوالی بات بھی غیر مستند ھے؛ کیونکہ علامہ قسطلانی نے " مواہب" میں اسکی صحت سے لاعلمی کا اظہار کیا ھے:

✴ وأخرج أبو نعيم: أن جابرًا ذبح شاة وطبخها، وثرد في جفنة، وأتى به رسول الله صلى الله عليه وسلم فأكل القوم، وكان صلى الله عليه وسلم يقول لهم: "كلوا ولا تكسروا عظمًا"، ثم إنه عليه الصلاة والسلام جمع العظام ووضع يده عليها ثم تكلم بكلام فإذا بالشاة قد قامت تنفض أذنيها، كذا رواه *والله أعلم*؟!

المصدر: المواھب اللدنیہ
المؤلف: احمد القسطلانی
المجلد:2
الصفحہ:578
الطبع: المکتب الاسلامی بیروت۔

🔴 *زرقانی کے حوالے سے*

 اسی طرح زرقانی نے  شرح مواہب میں اسی بات کی صراحت کی ھے کہ مذکورہ بالا واقعہ کی سچائی و صداقت بس اللہ کو معلوم ھے یعنی ہمکو اسکی صحت کا علم نہیں؛ کیونکہ مستند مراجع و مصادر اس واقعہ کے بیان سے ساکت ہیں۔   بس معلوم ہوا کہ یہ واقعہ قابل بیان نہیں ھے۔

💡"وأخرج أبو نعيم: أن جابرًا" هو ابن عبد الله، "ذبح شاة وطبخها، وثرد" فت الخبز "في جفنة" ووضع عليه الشاة، "وأتى به رسول الله صلى الله عليه وسلم، فأكل القوم" الذين عنده معه، وكان صلى الله عليه وسلم يقول لهم: "كلوا ولا تكسروا عظمًا"، ثم إنه عليه الصلاة والسلام جمع العظام في وسط الجفنة، "ووضع يده عليها، ثم تكلم بكلام" قال جابر: لم أسمعه، "فإذا الشاة قد قامت تنفض أذنيها" فقال: "خذ شاتك يا جابر، بارك الله لك فيها"، فأخذتها ومضيت، وإنها لتنازعني أذنها حتى أتيت بها المنزل، فقالت المرأة: ما هذا يا جابر؟ قلت: والله هذه شاتنا التي ذبحناها لرسول الله صلى الله عليه وسلم، فأحياها، فقالت: أشهد أنه رسول الله، "كذا رواه" أبو نعيم، "فالله أعلم" بصحته، وكذا رواه الحافظ محمد بن المنذر، والمعروف بشكر في كتاب العجائب والغرائب.

المصدر: شرح زرقانی علی المواھب
المؤلف: الزرقانی
المجلد:7
الصفحہ: 66
الطبع: دار الکتب العلمیہ, بیروت لبنان۔



__ *حاصلِ کلام* __
معتبر واقعہ فقط دعوت کا ھے جس میں مختصر سا کہانا بطور معجزے کے تمام صحابہ کو کفایت کرگیا؛ لیکن بقیہ دو باتیں یعنی حضرت جابر کے بیٹوں کو زندہ کرنا اور بکری کو زندہ کرنا ثابت نہیں ؛ لہذا ایسی بات کو بیان و نشر نہ کیا جائے۔ جتنا مستند و ثابت ھے اسی کو بیان کیا جائے۔

وﷲ تعالی اعلم
✍🏻...کتبہ: *محمد عدنان وقار صدیقی*
21/05/2019

حضرات حسنین کا وضو کی تعلیم دینا

*حضرات حسنین ؓ  کا طریقۂ تعلیم ونصیحت*

حضرات حسنین جب چھوٹے تھے تو ایک دن دونوں کی نظر مسجد۔نبوی میں ایک شخص پر پڑی جو غلط طریقے سے وضو کر رھے تھے , دونوں بھائی سوچنے لگے : کہ اگر ہم ان صاحب کو بتایئں کہ آپ کا وضو ٹھیک طریقے پر نہیں ہورہا ھے تو ان کی دل آزاری ہوگی ,چنانچہ دونوں بہائی ان صاحب کے پاس آئے اور کہنے لگے : ہم دونوں وضو کرتے ہیں اور آپ ہمیں دیکھ کر بتانا کہ ہم میں سے کس کا وضو درست اور ٹھیک ھے!!
جب دونوں شہزادوں نے وضو فرمایا, تو وہ صاحب کہنے لگے : کہ شہزادو! آپ دونوں کا وضو ہی ٹھیک ھے در اصل میرا وضو ٹھیک طریقے سے نہ تہا تو وہ صاحب اس طریقے سے وضو کرنا سیکھ گئے ۔

 اس واقعہ میں کتنی صداقت ھے آگاہ فرماکر مشکور ہوں!!

<< *باسمہ تعالی*>>
*الجواب باسم ملھم الصواب*

 یہ واقعہ اور حکایت فقط وعظ و نصیحت کے سلسلے میں عوام و وعظاء میں مشہور اور زباں زد ھے ؛ لیکن کسی کتاب میں اسکی سند مذکور نہیں ۔

  🔘 *واقعہ کی عربی عبارت*

وقد حكى أن الحسن والحسين (رضي الله عنهما وعن والديهما وعلى جدهما أفضل الصلاة وأتم التسليم) مرا بشخص يفسد وضوءه
فقال : أحدهما لأخيه تعال نرشد هذا الشيخ فقالا يا شيخ إنا نريد أن نتوضأ بين يديك حتى تنظر إلينا وتعلم من يحسن منا الوضوء ومن لا يحسنه ففعلا ذلك فلما فرغا من وضوئهما قال: أنا والله الذي لا أحسن الوضوء وأما أنتما فكل واحد منكما يحسن وضوءه فانتفع بذلك منهما من غير تعنت ولا توبيخ"

📓 *واقعہ کا ماخذ*

 المصدر : فیض القدیر
المؤلف: عبد الرؤوف المناوي ؒ
المجلد:2
الصفحة:328
الطبع:دار المعرفة، بيروت، لبنان
الدرجة حكاية بلا سند.

♻ یہ واقعہ امام مناوی نے اپنی کتاب" فیض القدیر" میں نصیحت کے باب میں ذکر کیا ھے؛ لیکن اسکی سند و حوالہ ذکر نہیں فرمایا ھے, بس معلوم ہوا کہ یہ محض حکایت ھے جس میں ایک اہم سبق موجود ھے کہ نصیحت اپنے کردار و طور طریقے سے بہی کی جاسکتی ھے , نصیحت میں کسی کی دل آزاری نہ کی جائے , یہی قرآن کریم سے ہمیں درس ملتا ھے ۔اسی صفحہ پر امام مناوی نے امام شافعی کا مقولہ نقل کیا ھے: کہ جس نے اپنے بہائی کو تنہائی میں نصیحت کی یعنی اسکی خطا و لغزش پر آگاہ کیا تو یہ حقیقت میں نصیحت ھے اور اگر لوگوں کے سامنے کھلم کھلا ٹوکا تو یہ تو رسوا کرنا ھے۔

➖ •••سوال•••➖

 کیا وعظ و نصیحت پر مشتمل حکایات و واقعات بنا سند بیان کیے جاسکتے ہیں...؟

 ▪ *جواب*▪

جی ہاں!! نیک لوگوں کے مواعظ, بزرگوں کے واقعات, عبادتگزاروں کی حکایتیں, حکماء کے پند و نصائح, واعظین کی باتیں بنا سند بہی بیان کی جاسکتی ہیں ؛ تاہم ان کی سند بہی مل جائے تو بیان میں حسن و خوبصورتی پیدا ہوجائے۔

🛑واما اخبار الصالحین وحکایات الزاھدین والمتعبدین ومواعظ البلغاء وحکم الادباء, فالاسانید زینة لها.وليست شرطا لتاديتها.

کتاب: نوادر الحديث
صفحہ:41.
مؤلف: الشيخ يونس الجونفوري ؒ  طبع:اداره افادات اشرفيه دوبگه هردوي روڈ لکہنؤ )۔

    ⚠ *الحاصل*

 اس حکایت کو وعظ و نصیحت کے سلسلے میں بیان کرنے کی گنجائش ھے ؛ تاہم یاد رھے کہ فقط حکایت ھے اور محض ایک سبق آموز واقعہ۔

والله تعالي اعلم
✍🏻...کتبہ: « *محمد عدنان وقار صدیقی*  »

آدم کے آنسوں اور چیل

*حضرت آدم کے آنسوں*


جب حضرتِ آدم کو خطا کے بعد دنیا میں بھیجا گیا تو حضرت ندامت سے رونے لگے اور اللہ سے استغفار کرنے لگے روتے روتے زمین پر آنسو جمع ہو گئے کہتے ہے ایک پیاسی چیل آئی  اور وہ اُن آنسوؤں کو پینے لگی اور کہنے لگی یہ میٹھے پانی کا چشمہ کہاں سے نکلا حضرتِ آدم نے فرمایا یہ میری ندامت کے آنسوں ہیں,اُس چیل نے کہا مجھے زمین پر رہتے ہوئے 2ہزار  سال ہو گئے آج تک میں نے اتنا میٹھا پانی کبھی نہیں پیا پھر چیل نے کہا یاد رکھنا آدم ندامت سے نکلا ہوا آنسوں دنیا کے سارے چشموں کے پانی سے زیادہ میٹھا ہے ۔


 کیا یہ واقعہ دُرست ہے
رہنمائی فرمائیں!!!

<< *باسمہ تعالی*>>
*الجواب باسم ملھم الصواب*

 جی یہ واقعہ دو بڑے جلیل القدر بزرگ, اماموں نے اپنی کتاب میں ذکر فرمایا ھے؛ لیکن فقط از روئے نصیحت ذکر کیا ھے ؛ تاہم یہ واقعہ حدیث نبوی نہیں ھے کہ اسکی نسبت حضور کی جانب کی جاسکے ۔

♦ *واقعہ کی عبارت*

حَدَّثَنِي يَعْقُوبُ بْنُ إِسْحَاقَ بْنِ دِينَارٍ  ، قَالَ : حَدَّثَنَا مُعَاذٌ الْعَنْبَرِيُّ ، عَنِ ابْنِ السَّمَّاكِ ، قَالَ : حَدَّثَنِي  عُمَرُ بْنُ ذَرٍّ ، عَنْ مُجَاهِدٍ :  " أَنَّ آدَمَ لَمَّا أَكَلَ مِنَ الشَّجَرَةِ تَسَاقَطَ عَنْهُ  جَمِيعُ زِينَةِ الْجَنَّةِ ، فَلَمْ يَبْقَ عَلَيْهِ شَيْءٌ مِنْ زِينَتِهَا إِلا التَّاجُ وَالإِكْلِيلُ وَجَعَلَ لا يَسْتَتِرُ بِشَيْءٍ مِنْ وَرَقِ الْجَنَّةِ إِلا سَقَطَ عَنْهُ فَالْتَفَتَ إِلَى حَوَّاءَ بَاكِيًا وَقَالَ : اسْتَعِدِّي لِلْخُرُوجِ مِنْ جِوَارِ اللَّهِ , هَذَا أَوَّلُ شُؤْمِ الْمَعْصِيَةِ . قَالَتْ : يَا آدَمُ مَا ظَنَنْتُ أَحَدًا يَحْلِفُ بِاللَّهِ كَاذِبًا , وَذَلِكَ أَنَّ إِبْلِيسَ لَمَّا قَاسَمَهُمَا عَلَى الشَّجَرَةِ , وَانْطَلَقَ آدَمُ فِي الْجَنَّةِ هَارِبًا اسْتِحْيَاءً مِنْ رَبِّ الْعَالَمِينَ ، فَتَعَلَّقَتْ بِهِ شَجَرَةٌ بِبَعْضِ أَغْصَانِهَا ، ظَنَّ آدَمُ أَنَّهُ قَدْ عُوجِلَ بِالْعُقُوبَةِ , فَنَكَّسَ رَأْسَهُ يَقُولُ : الْعَفْوَ الْعَفْوَ . فَقَالَ اللَّهُ : يَا آدَمُ فِرَارًا مِنِّي ؟ قَالَ : بَلْ حَيَاءً مِنْكَ سَيِّدِي . فَأَوْحَى اللَّهُ إِلَى الْمَلَكَيْنِ : أَخْرِجَا آدَمَ وَحَوَّاءَ مِنْ جِوَارِي ، فَإِنَّهُمَا قَدْ عَصَيَانِي . فَنَزَعَ جِبْرِيلُ التَّاجَ عَنْ رَأْسِهِ ، وَحَلَّ مِيكَائِيلُ الإِكْلِيلَ عَنْ جَبِينِهِ . قَالَ مُجَاهِدٌ فَلَمَّا أُهْبِطَ مِنْ مَلَكُوتِ الْقُدُسِ إِلَى دَارِ الْجُوعِ وَالْمَسْغَبَةِ ، بَكَى عَلَى خَطِيئَتِهِ مِائَةَ سَنَةٍ . قَدْ رَمَى بِرَأْسِهِ عَلَى رُكْبَتَيْهِ حَتَّى نَبَتَتِ الأَرْضُ عُشْبًا وْأَشْجَارًا مِنْ دُمُوعِهِ ، حَتَّى يَقَعَ الدَّمْعُ فِي نُقُرِ الْجَلاهَمِ وَأَقْعِيَتِهَا . فَمَرَّ بِهِ نَسْرٌ عَظِيمٌ قَدْ أَجْهَدَهُ الْعَطَشُ ، فَشَرِبَ مِنْ دُمُوعِ آدَمَ وَأَنْطَقَ اللَّهُ النَّسْرَ فَقَالَ : يَا آدَمُ إِنِّي فِي هَذِهِ الأَرْضِ قَبْلَكَ بِأَلْفَيْ عَامٍ , وَقَدْ بَلَغْتُ شَرْقَ هَذِهِ الأَرْضَ وَغَرْبَهَا ، وَشَرِبْتُ مِنْ بُطُونِ أَوْدِيَتِهَا ، وُغُدْرَانِ جِبَالِهَا ، وَسِيفِ بِحَارِهَا ، مَا شَرِبْتُ مَاءً أَعْذَبَ وَلا أَطْيَبَ رَائِحَةً مِنْ هَذَا الْمَاءِ . قَالَ آدَمُ وَيْحَكَ يَا نَسْرُ ! أَتَعْقِلُ مَا تَقُولُ ؟ مِنْ أَيْنَ تَجِدُ عُذُوبَةَ دَمْعِ مَنْ عَصَى رَبَّهُ ، وَجرَى عَلَى خَدَّيْنِ عَاصِيَيْنِ ؟ وَأَيُّ دَمْعٍ أَمَرُّ مِنْ دَمْعِ عَاصٍ ؟ وَلَكِنْ أَظُنُّ بِكَ أَيُّهَا النَّسْرُ أَنَّكَ تُعَيِّرُنِي لأَنِّي عَصَيْتُ رَبِّي ، فَأُزْعِجْتُ مِنْ دَارِ النِّعْمَةِ إِلَى دَارِ الْبُؤْسِ وَالْمَسْكَنَةِ . فَقَالَ النَّسْرُ : يَا آدَمُ أَمَّا مَا ذَكَرْتَ مِنَ التَّعْيِيرِ ، فَمَا أُعَيِّرُكَ ، وَلَكِنْ هَكَذَا وَجَدْتُ طَعْمَ دُمُوعِكَ . وَأَيُّ دَمْعٍ أَعْذَبُ مِنْ دَمْعِ عَبْدٍ عَصَى رَبَّهُ ، وَذَكَرَ ذَنْبَهُ ، فَوَجِلَ قَلْبُهُ ، وَخَشَعَ جِسْمُهُ ، وَبَكَى عَلَى خَطِيئَتِهِ خَوْفًا مِنْ رَبِّهِ "  .

🔘 *ترجمہ مع خلاصہ*

 جب آدم نے شجرہ ممنوعہ سے کچھ کھالیا تو بحکم خداوندی ان کے جنتی لباس وتاج وغیرہ سب اتارلیے گئے, آدم اللہ سے بہت شرمارھے تھے تو اللہ نے پھر دو فرشتوں کو حکم دیا : کہ آدم کو مع ان کی اہلیہ حواء کے ہمارے پڑوس سے اب دور لیجاؤ. غرضیکہ ان کے تاج و لباس واپس لے لیے گئے اور جب آدم ملاء اعلی سے اس بہوک و غربت کی دنیا میں آئے

تو 100 سال گھٹنوں پر سر رکھ کر روتے گئے اور اتنا روئے کہ ان کے آنسوؤں سے زمین میں کچھ گھاس بہی اگ آئی , اور کثرت آنسوں نے چھوٹی چٹان و پتہر میں سوراخ بہی کردیا .
 چنانچہ ایک مرتبہ وہاں سے ایک چیل (گدھ) کا گزر ہوا جسکو سخت پیاس لگی تہی تو اس نے آدم کے آنسوؤں سے بہنے والے چشمہ سے پی لیا , تبہی خداوند نے اس چیل (پرندہ) کو گویائی عطا کی ,اور وہ چیل کہنے لگی : کہ آدم! میں دو ہزار سال سے آپ سے بہی پہلے سے اس دنیا میں ہوں. اور میں نے مشرق و مغرب کو گھوما ھے, پہاڑوں کے جہرنوں , وادیوں اور سمندروں کے پانی سے پیا ھے؛ لیکن اس پانی سے زیادہ شیریں ذائقہ کبہی نہ پیا.
حضرت آدم بولے: اے چیل ! تو مجھے عار دلا رہی ھے بھلا گنہگار کے آنسوؤں میں کڑواہٹ کے سوا کیا ہوسکتا ھے

 تو چیل نے کہا: میں عار نہیں دلارہی ہوں ؛ بلکہ میں نے حقیقتا وہ ذائقہ محسوس کیا ھے اور گنہگار بندے کے آنسوں جو رب کے آگے گناہ کو یاد کرکے نکلتے ہیں اس سے زیادہ شیریں پانی ہوتا ہی نہیں ھے ۔

📓 *واقعہ کا مصدر*

 یہ واقعہ امام ابن ابی الدنیا رح نے اپنی کتاب" الرقة والبكاء " مىں ذكر كيا هے.

المصدر: الرقة والبكاء
المؤلف: ابن ابي الدنيا
الصفحة: 225
رقم القصة: 328
الطبع: دار ابن حزم، بيروت، لبنان

♻ *دوسرا مصدر*

 اسی طرح یہ واقعہ قدامة مقدسي نے بہی ذکر کیا ھے :

المصدر: الرِّقة والبكاء
المؤلف: موفق الدين قدامة المقدسي
الراوي: مجاهد
الصفحة: 60
الطبع: دار القلم، دمشق، الشام

🛑 *واقعہ کی حیثیت*
 یہ واقعہ جیسا کہ محققین نے کہا ھے از قبیل اسرائیلیات ھے ۔

(حوالہ بالا)

 ◀   اسرائیلیات وہ باتیں جو بنی اسرائیل یعنی یہودیوں سے بکثرت منقول ہیں یا نصاریٰ سے۔

شیخ الاسلام مفتی محمد تقی عثمانی مدظلہ نے رقم فرمایا کہ:

"اسرائیلیات یا اسرائیلی روایات ان روایات کو کہتے ہیں جو یہودیوں یا عیسائیوں سے ہم تک پہنچی ہیں ان میں سے بعض براہِ راست بائبل یا تالمود سے لی گئی ہیں بعض منشاءاوران کی شروح سے اوربعض وہ زبانی روایات ہیں جو اہل کتاب میں سینہ بسینہ نقل ہوتی چلی آئی ہیں اور عرب کے یہود ونصاری میں معروف ومشہور تھیں"۔

 (علوم القرآن, صفحہ: 345, طبع: مکتبہ دار العلوم کراچی)

⚫  *اسرائیلیات کا حکم*⚫

   اس سلسلہ میں تقریباًً علمائے امت نے ایک ہی جواب دیا ،الفاظ وتعبیرات اگر چہ مختلف ہیں؛ لیکن حکم ایک ہی ہے، آگے ہم مختلف علماء کرام کی تحریریں پیش کریں گے،
سب سے پہلے شیخ الاسلام مفتی محمد تقی عثمانی مدظلہ کے دلنشین اورصاف وشفاف تحریر کو نقل کرتے ہیں جو انہوں نے علامہ ابن کثیرؒ کے حوالہ سے پیش کی ہے؛ چنانچہ رقمطراز ہیں کہ:
(۱)پہلی قسم وہ اسرائیلیات ہیں جن کی تصدیق دوسرے خارجی دلائل سے ہوچکی ہے مثلا: فرعون کا غرق ہونا وغیرہ، ایسی روایات اسی لیے قابلِ اعتبار ہیں کہ قرآن کریم یا صحیح احادیث نے ان کی تصدیق کردی ہے۔

 (۲)دوسری قسم وہ اسرائیلیات ہیں جن کا جھوٹ ہونا خارجی دلائل سے ثابت ہوچکا ہے،مثلا: یہ کہانی کہ حضرت سلیمان علیہ السلام آخر عمر میں (معاذ اللہ) بت پرستی میں مبتلا ہوگئے تھے یہ روایت اس لیے قطعا باطل ہے کہ قرآن کریم نے صراحۃ ًاس کی تردید فرمائی ہے۔

 (۳) تیسری قسم ان اسرائیلیات کی ہے جن کے بارے میں خارجی دلائل ہے نہ یہ ثابت ہو تا ہے کہ وہ سچی ہیں اورنہ یہ ثابت ہوتا ہے کہ جھوٹ ہیں، مثلا تورات کے احکام وغیرہ ایسی اسرائیلیات کے بارے میں نبی کریم صلی اللہ علیہ وسلم کا ارشاد ہے: "لا تصدقوھا ولاتکذبوھا"۔ اس قسم کی روایات کو بیان کرنا تو جائز ہے؛ لیکن ان پرنہ کسی دینی مسئلہ کی بنیاد رکھی جاسکتی ہے نہ ان کی تصدیق یا تکذیب کی جاسکتی ہے *اوراس قسم کی روایات کو بیان کرنے کا کوئی خاص فائدہ بھی نہیں*۔

(علوم القرآن:صفحہ: 346, طبع: مکتبہ دار العلوم کراچی).

••• *خلاصہ کلام* •••

مذکورہ واقعہ توبہ و استغفار اور خدا کے آگے گریہ و زاری کی ترغیب کے سلسلے میں حدیث کا عنوان دیئے بغیر  بیان کیا جاسکتا ھے ۔

✍🏻...کتبہ: *محمد عدنان وقار صدیقی*

منٹوں میں ارب پتی بنئے

▪ *منٹوں میں ارب پتی بنیئے* ▪

حضرت تمیم داری حضور سے روایت کرتے ہیں: کہ جوشخص دس مرتبہ "أشهَدُ أن لا إلَهَ إلَّا اللَّهُ ، وحدَهُ لا شريكَ لَهُ، إلَهًا واحدًا أحَدًا صمَدًا، لم يتَّخِذْ صاحبةً ولا ولَدًا، ولم يَكُن لَهُ كُفوًا أحدٌ" کہے گا تو اللہ تعالیٰ اس کیلئے چار کروڑ نیکیاں لکھے گا ۔
اور چونکہ رمضان میں ہر نیکی کا ثواب ستر 70 گنا زیادہ ملتا ھے ؛ تو اس لحاظ سے ان الفاظ کا ثواب دو ارب اسی کروڑ ہوجایئگا۔

   اس روایت کی تحقیق مطلوب ھے ؛ یہ روایت مساجد اور عوامی مقامات پر پمفلٹ اور اشتہار کی صورت میں عام ہورہی ھے!!!

<< *باسمہ تعالی*>>
*الجواب وبہ التوفیق*

مذکورہ پوسٹ دو باتوں پر مشتمل ھے:
1) حضرت تمیم داری کی روایت جس میں مذکورہ کلمات پڑھنے پر چار کروڑ نیکیاں ملنے کا ذکر ھے۔
2) رمضان کریم میں ہر نیکی کا اجر ستر گنا زیادہ ہوجاتا ھے۔

1⃣ *حضرت تمیم کی روایت*

🔘حدثنا قتيبة، قال حدثنا الليث، عن الْخَلِيل بْن مُرَّةَ ، عَنِ الْأَزْهَرِ بْنِ عَبْدِ اللهِ ، عَنْ تَمِيمٍ الدَّارِيِّ، قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ : ( مَنْ قَالَ: أَشْهَدُ أَنْ لَا إِلَهَ إِلَّا اللَّهُ وَحْدَهُ لَا شَرِيكَ لَهُ ، إِلَهًا وَاحِدًا أَحَدًا صَمَدًا، لَمْ يَتَّخِذْ صَاحِبَةً وَلَا وَلَدًا، وَلَمْ يَكُنْ لَهُ كُفُوًا أَحَدٌ، عَشْرَ مَرَّاتٍ كَتَبَ اللَّهُ لَهُ أَرْبَعِينَ أَلْفَ أَلْفِ حَسَنَةٍ ) .

« *ترجمة*»
حضرت تمیم داری سے مروی ھے: کہ حضور کریم کا ارشاد ھے: کہ جس نے مذکورہ کلمات دس مرتبہ پڑھے تو ﷲ اسکے لیے چار کروڑ نیکیاں لکھے گا۔

المصدر: سنن الترمذي
الراوي: تميم الجاري
المحدث: ابو عيسي الترمذي
المجلد: 5
الصفحة: 461
الرقم: 3473
الطبع: دار الغرب الاسلامي، بيروت، لبنان.

♦ جبکہ مسند احمد میں چار کروڑ کی بجائے چالیس ہزار نیکیوں کا ذکر ھے۔

 ※ المصدر: مسند احمد
    الراوي:تميم الداري
    المحدث: احمد بن حنبل
    المجلد: 28
    الصفحة: 151
    الرقم:16952
    الدرجة:ضعيف، ومنقطع
    المحقق: شعيب الارنؤوط
    الطبع:مؤسسة الرسالة، بيروت


🔰 اسی طرح طبرانی کی المعجم الکبیر میں بہی چالیس ہزار کا لفظ موجود ھے

 。 المصدر: المعجم الكبير
      الراوی: تمیم الداری
      المحدث: طبرانی
      المجلد:2
      الصفحة: 57
      الرقم:1278
      الطبع:مكتبة ابن تيمية، قاهرة، مصر

⚠ *امام ترمذی کا قول*

   امام ترمذی روایت ذکر کرنے کے بعد اس پر کلام فرماتے ہیں : کہ سند میں ایک راوی" خلیل بن مرہ" ہیں جو کہ محدثین کے نزدیک قوی نہیں ہیں نیز امام بخاری رح نے "خلیل بن مرہ" کو *منکَر الحدیث* کہا ھے.

🔅هذا حديث غريب لا نعرفه إلا من هذا الوجه "والخليل بن مرة" ليس بالقوي عند أصحاب الحديث، قال محمد بن إسماعيل "هو منكر الحديث").


(ترمذی حوالا بالا)

♻ *امام بخاری کے قول کی صراحت*

 امام بخاری کی صراحت کے مطابق وہ جسکو منکر الحدیث کہتے ہیں تو اس سے روایت نہ کی جائے ۔

▫قال البخاري: كل من قلت فيه "منكر الحديث " فلا تحل الرواية عنه.

المصدر: مقدمة التحقيق لاعلاء السنن (حاشية)
المحقق: عبد الفتاح ابوغدة
الصفحة: 258
الطبع: إدارة القرآن والعلوم الاسلامية، كراتشي، باكستان.

🛑لیکن امام بخاری کا یہ قاعدہ خود منتقد علیہ ھے یعنی اس قاعدے کی خلاف ورزی خود امام بخاری کرتے ہیں بس معلوم ہوا کہ یہ قول بخاری کہ جسکو میں منکرالحدیث کہدوں اس سے روایت حلال نہیں یہ قاعدہ محل نظر ھے؛ کیونکہ ابن عدی جیسے معتدل محدث نے خلیل بن مرہ کو ضعیف کہا ھے متروک نہیں کہا جیساکہ آگے آرہا ھے۔ اسی طرح ابن حجر نے بہی ضعیف کہا ھے

دیکھئے!
  الرفع والتکمیل , صفحہ: 208 تا 210, طبع: دار السلام، قاهرة، مصر.

🔴 اور "خلیل بن مرة" کے متعلق ابن عدی نے الکامل میں لکہا ھے: کہ ان کی روایت کردہ حدیث قبول کی جاسکتی ھے ؛ کیونکہ یہ متروک الحدیث نہیں ہیں ۔

▪قال الشيخ: وللخليل احاديث غير ما ذكرته أحاديث غرائب، وهو  شيخ بصري، وقد حدث عنه الليث غير ما ذكرته وأهل الفضل، ولم أر في أحاديثه حديثا منكرا قد جاوز الحد، وهو في جملة من يكتب حديثه، وليس هو بمتروك الحديث.

المصدر: الكامل في الضعفاء
المؤلف: ابن عدي
المجلد: 1
الصفحة:930
الطبع: دار الفكر بيروت.

✳⚠ *خلیل بن مرہ ابن حجر کی نظر میں*

خليل بن مرة الضبعي -بضم المعجمة وفتح الموحدة- البصري نزيل الرقة، ضعيف، من السابعة، مات سنة ستين.

ترجمة: خليل بن مرة ضعيف هيں.

المصدر: تقريب التهذيب
المؤلف: ابن حجر العسقلاني
الصفحة: 302
الرقم: 1767
الطبع: دار العاصمة،

🌐 *دوسری بات کی تحقیق*

 رمضان المبارک میں ہر نیکی کا اجر بڑھ کر 70 گنا ہوجاتا ھے
یہ بات درست ھے کہ ماہ رمضان میں عبادات کا اجر و ثواب دو چند ہوجایا کرتا ھے ؛ لیکن 70 گنا اجر کی صراحت روایات میں نہیں البتہ اتنا ضرور ھے کہ ماہ رمضان میں نفل عبادت کا اجر ایسا ھے کہ جیسے فرض کا ثواب اور فرض ادا کرنے کا ثواب اتنا ھے کہ جتنا 70 فرض ادا کرنے کا ثواب.. یعنی ایک فرض کی ادایئگی پر 70 گنا اجر بڑھ جاتا ھے نہ کہ نفل و مستحبات کا لہذا کسی بہی ذکر و اذکار کے متعلق اپنی جانب سے کسی عدد کے ساتھ خاص نہ کیا جائے۔

📓عن سلمان الفارسي رضي الله عنه أنه قال : ( خطبنا رسول الله صلى الله عليه وسلم في آخر يوم من شعبان فقال : أيها الناس قد أظلكم شهر عظيم مبارك ، شهر فيه ليلة خير من ألف شهر ، جعل الله صيامه فريضة ، وقيام ليله تطوعاً ، *من تقرب فيه بخصلة من الخير كان كمن أدى فريضة فيما سواه ومن أدى فيه فريضة كان كمن أدّى سبعين فريضة فيما سواه* الخـ...

المصدر: صحيح ابن خزيمة
الراوي: سلمان الفارسي
المحدث: محمد بن اسحاق
الصفحة:191
الرقم:1877
الدرجة: ضعيف
الطبع: المكتب الاسلامي، بيروت، لبنان

⏳ *رمضان میں نیکیوں کا اجر*

رمضان میں اعمال صالحہ کا اجر بڑھ جاتا ھے اور اسی طرح رمضان میں اعمال بد کا گناہ و وبال بہی بڑھ جاتا ھے؛حضرت ابوہریرہ سے مَروی ہے کہ نبی کریمﷺ اِرشاد فرماتے ہیں :

”فَاتَّقُوا شَهْرَ رَمَضَانَ، فَإِنَّ الْحَسَنَاتِ تُضَاعَفُ فِيهِ مَا لَا تُضَاعَفُ فِيمَا سِوَاهُ وَكَذَلِكَ السَّيِّئَاتُ“

رمضان کے مہینے میں(اللہ تعالیٰ سے)ڈرتےرہنا کیونکہ اِس مہینے میں نیکیوں(کے اجر)کو اِس قدر بڑھادیا جاتاہے جتنا رمضان کے علاوہ کسی مہینے میں نہیں بڑھایا جاتا، اِسی طرح گناہوں(کے وَبال)کو بھی (اِس قدر بڑھادیا جاتا ہےجتنا رمضان کے علاوہ کسی مہینے میں نہیں بڑھایا جاتا)۔

 المصدر: المعجم الاوسط
الراوی: ابو ھریرہ
المحدث: طبرانی
المجلد: 5
الرقم: 4827
الطبع: دار الحرمین للطباعہ, قاہرہ, مصر۔

🌷حقیقت یہ ھے: کہ جگہ کے محترم و مشرف ہونے اور زمانہ کے بابرکت و باعظمت ہونے کی بنا پر بہی اعمال کا اجر بڑھ جایا کرتا ھے اس کی صراحت علامہ ابن رجب حنبلی نے بہی " لطائف المعارف" میں فرمایئ ھے؛ اور مزید فرمایا: کہ ابراہیم نخعی رح کہا کرتے تھے کہ رمضان میں تسبیحات کا اجر غیر رمضان کے مقابلے میں ہزار تسبیحات سے افضل ہوجاتا ھے۔

دیکھئے:

لطائف المعارف
مؤلف: ابن رجب
صفحہ: 284 تا 285
طبع:دار ابن کثیر , دمشق۔

<< *الحاصل*>>

   حضرت تمیم داری والی روایت میں جو چار کروڑ نیکیوں کا ذکر ھے وہ روایت کمزور ھے لہذا اسکی نسبت نبی کریم کی جانب کرنے اور اس قدر فضیلت ماننے میں احتیاط کرنی چاہئے,کیونکہ روایات میں الفاظ بہی مختلف ہیں جیساکہ ہم بیان کرچکے ہیں,تاہم بہت زیادہ کمزور نہیں ھے کہ روایت ناقابل بیان ہو, نیز ماہ رمضان میں اعمال صالحہ کے اجر وثواب میں اضافے و زیادتی سے کسی کو انکار نہیں ؛ البتہ اجر و ثواب کی اپنی جانب سے تحدید نہ کیجائے۔ ہاں جن احادیث میں اجر کی تحدید مذکور ھے اسکو اسی محدد اجر کی صراحت کے ساتھ بیان کیا جائے۔ مذکورہ ورد و ذکر جو حضرت تمیم
کی روایت میں ھے اس میں چار کروڑ والی بات تک بیان کیا جائے اسکو رمضان میں زیادتی اجر والی روایت سے ضرب دیکر اربوں نیکیاں بیان نہ کی جایئں۔

وﷲ تعالی اعلم
✍🏻...کتبہ: *محمد عدنان وقار صدیقی*